KANANNA ANA' LOLOA

Disalin dalam kitab taj al khalwatiyah syech yusuf gowa KANANNA ANA LOLOA (versi mks) Iyaminne ampa’nassai bicaranna ana’ loloa ri ALLAHU TA’ALAH siwattu takkimbolonna ijapa ri battanna anronna. Naiya ganna’namo limambulang nitiyanannngang ri anronna, nampami a’donteng tauwa. Nisuromi malaikat jibrailu ri ALLAHU TA’ALAH ampauwanngi janjinna ana’ loloa, ri syareaka, ri sambayang lima wattua. Nanakana malaekat JIBRAILU : Eh syahada’ nipa’jari sulapa’ appa’nu manggaukang sambayang lohoro, inakke angkankangi sura’ dalle’nu. Karna kammaminjo napatan rakang sambayang lohoroka, saba’ appattongi sulapatta. Karna kammaminjo natena tau anngissengi pabboya-boyanna kabattuan dallena. Naiya ganna’namo annang bulang nitiyananngan nisuromi malaekat niarenga MIKAILU ampauwanngi janjinna ana loloa : Eh syahada’, nipa’jari ri kau appa pattangkeyang, nikellaiko makkusiyang ri wattu asharaka, inakke angkankangi sura’ nikkanu. Nanakanamo ana’ loloa Na’am (iyo). Kammamintu napatan rakang sambayang asharaka nalanri appatongi pattangkeyang natena tommo tau angassengi lana aganga sisurakkang. Naiya ganna’namo tuju bulang nitiyananngan, nisuroiseng malaekat niarenga ISRAFILU ampauwanngi ana’ loloa : Eh syahada’, nipa,jari bawanu nikellaiko annyomba ri wattu manngaribiya, inakke anngerangi sura’ ajjala’nu. Katallu tongi so’bolo’na ka’murua rua, bawayya se’re. Iya tommintu natani assenga antu ajjalatta. Naiya ganna’namo sagantuju bulang nitiyananngan, nisuroiseng malaekat niarenga IZRAILU antama anjanji ana’ loloa angkana : Eh syahada’, nipa’jari tolinnu siagang matannu, nikellaiko annyomba ri wattu isya ya, inakke anngerangi pattarawanngannu. Nakanamo ana loloa : Na’am (iyo). Karna kammaminjo napatang rakang sambayang isya ya, karua toli, rua todong matannta, iya tommintu natena tau appantantui pattarawanganna. Naiya ganna’namo salapang bulang nitiyananngan, nakanamo ALLAHU TA’ALAH ri ana’ loloa : Eh syahada kupa’jari katawannu siagang pajanu, nikellaiko annyomba ri wattu subua. Karna kammaminjo naruang rakang sambayang subua. Naiya leba’namo naiyoi janjinna ana’ loloa ri syareaka, nakanamo ALLAHU TA’ALAH ri ana’ loloa : Eh syahada assulu’mako ri linoku naku sareko sipa’. Nakanamo ana’ loloa kere sipa lanisareanga karaeng.? Nakanamo ALLAHU TA’ALAH : sipa niyakku kupa’jariko tubu, sipa kalompoangku kupa’jariko nyawa, sipa kakalumannyanganku kupa’jariko ati, sipa kase’reyangku kupa’jariko rahasia. Nakanamo ana’ loloa : Eh karaeng taerokkapa’ assulu nasaba anu kipare’ji ri nakke. Napunna sallang kiallemo paretta, anngapama’ inakke. Nakanamo ALLAHU TA’ALAH : kamma tojengi kanannu, mingka kukellaimako assulu’ ri linoku naku sareko singara. Nakanamo ana’ loloa : Eh karaengku, singara apa lakisareyanga.? Nakanamo ALLAHU TA’ALAH : punna niya singara assulu ri pocci’nu kamma batang kaluku annarrusu nai’ ri langika, ri langi tujua lonjo’na, tulusu naung ri butta tujua lapisi’na. Naiya singaraka, singaranngangi namatanna allowa siagang bulanga, ci’nong simata mata taena passanggaenna anjo singaraka, Naniya tau ilalanganna singaraka. Na antu singara, singara kebo, naniya tau ammake moncong bulo, nanakana ri kau : maeko. Naniya tong ampisangkaiko nakana rikau : Teyako a’lampai. Syetang jintu, teyako jampangi, iyamintu nabbita SAW, pinawangi. Nakanamo Ana’loloa : tamaeroka assulu.? nakaseng ALLAHU TA’ALA ri Ana’loloa : assulu mako ri linoku, naku sareko pole singara.? Nakaseng Ana’loloa : Eh karaengku, singara apaseng lakisareyanga.? Nakanamo ALLAHU TA’ALAH : punna niya sallang singara assulu ri batang kalennu, iyami nupinawang, iyami sallang nupare sulo mae ri nakke, nucini’ma antu. Nakaseng Ana’loloa : Eh karaeng tamaerokapa assulu.? Nakanamo ALLAHU TA’ALAH anngapai nuteya assulu.? Nakanamo Ana’loloa : Eh karaeng, iyaminjo kuteya assulu saba’ akkulleiji napare iblisi.? Nakanamo ALLAHU TA’ALAH anngapai nanuasseng angkana akkulleji napare iblisi, naruaja kusareyangi iblisi, uru-uruna kana kanaya, makaruana maccinika. Kamma tau, rua tongi tanakulle napare iblisi, uru-uruna tanipauwa, makaruana tanipareka nale’ba. Ancuruki iblisi punna eroki napassingkammai. Nakana pole ALLAHU TA’ALAH : assulu mako ri linoku naku sareko singara.? Nakanamo Ana’loloa : Eh karaeng, singara apa lakisareyanga.? Nakanamo ALLAHU TA’ALAH : punna niya singara battu ri abannu, tallui sipammentengan, iyamintu nikana BUDDUHUN, makaruana BADIY’UN, makatalluna nikana QUDDUSUN. iyamintu nipinawang. Nakanamo Ana’loloa : kamma tojeng karaeng, naiyyajiyya anjo singaraka kereimae pappokokanna, kataena sikali singara naagang singkamma singara’na abanku, punna taena nabattu anngapama nakke.? nakanamo ALLAHU TA’ALAH : kamma tojengi kanannu. Asseng bajiki nakupauwangko kabattuanna singara tallua, se’re battui ri ALLAHU TA’ALAH, se’re battui ri NABBITA, se’re battui ri TAUWA, Nakanamo Ana’loloa : Eh karaeng, tamaerokapa assulu.? Nakamo ALLAHU TA’ALAH : anteikamma nuteya assulu,? Nakanamo Ana’loloa : Eh karaeng, iyaminjo kuteya assulu, kakanaji bawang, takucinikai angkanangi passanngalinna pallangereji allangerek Karna kamma minjo naku teapa assulu, gassingki inakke kalawu na iya anrai, kassang kamma ja para sipa’ji nipajjari. Nakanamo ALLAHU TAALAH tojengintu kanannu.? Assulu mako ri linoku naku sareko pole singara. Nakanamo Ana loloa, Eh karaeng kere singara naki sareanga.? Nakanamo ALLAHU TAALAH niya antu singa LE’LENG yareka nasingara KEBO, yareka nasingara MONCONG BULU, teako pinawangi riyolo, napunna niya’mo sangkamma tanja’nu iyamintu pinawang. Nakanamo ana loloa: Eh karaeng.?, napunna kammai antu kananta taenamo naku boyaki, saba’ punna niyamo parangku pare’ sangkamma tanjakku iyami kupinawang, Eh karaeng tama eroka assulu. Nakanamo ALLAHU TAALAH: Asssulu mako rilinoku naku sareko SYAREAT, THARIQAT, HAQIQAT siagang MA’ARIFAT. Nakanamo Ana loloa: Eh karaeng kere nikana SYAREAT, THARIQAT, HAQIQAT siagang MA’ARIFAT.? Nakanamo ALLAHU TAALAH: Naiya nikanaya SYAREAT tubunu, naiya nikanaya THARIQAT Atinnu, naiya nikanaya HAQIQAT nyawanu naiya nikanaya MA’ARIFAT iyamintu Rahasianu. Nakanamo ana loloa: Eh karaeng tama erokapa assulu nasaba kuassengji kabattuanna anjo kipakkanaiya.? Nakanamo ALLAHU TAALAH: Paumi naku lanngere.? Nakanamo ana loloa: Naiya SYAREAT ka battui ributtaya, Naiya THAREQAT ka battui rije’neka, Naiya HAQIQAT ka battui riAnginga, Naiya MA’AREFAT ka battui ripepe’ ka. Apaji naku singkammaji para nipajjari para niarenji. Nakanamo ALLAHU TAALAH: Tojengi antu kanannu mingka assulu mako rilinoku naku sareko SA’RA. Nakanamo ana loloa: Eh karaeng kere SA’RA naki sareanga.? Nakanamo ALLAHU TAALAH: Niya antu SA’RA angkana (A) iyamintu piassengi.? Napunna niya sa’ra angkana (I) assemmi ma’nassa NABBI MUHAMMAD, napunna niya sa’ra angkana (U) assemmi ma’nassa kalennu. Nakanamo ana loloa: Eh karaeng takkulle sikali kaliyai niya sa’ra punna tena patanna sa’ra.? Nakanamo ALLAHU TAALAH: Tojengi kanannu, mingka assulu mako rilinoku naku sareko DZIKKIRI APPA, Nakanamo ana loloa: kere karaeng DZIKKIRI naki sareanga,? Nakanamo ALLAHU TAALAH: Uru uruna Dzikkiri’na TUBUNU, maka ruana Dzikkiri’na ATINNU, maka talluna Dzikkiri’na NYAWANU, maka appa’na Dzikkirina RAHASIANU. Naiya Dzikkiri’na Tubunu angkanaya (HUWA-HUWA) Naiya Dzikkiri’na Atinnu angkanaya (IH-IH) Naiya Dzikkiri’na Nyawanu angkanaya (HU-HU) Naiya Dzikkiri’na Rahasianu angkanaya (AH-AH). Nakanamo ana loloa: Antu kipaua anu kipareji ri kalenta, Eha karaeng tama ero assulu.? Nakanamo ALLAHU TAALAH: Nuli nguima antu punna kamma antu kanannu, saba’ sikuntu kukanaya baji kusareang mako nuteyapa assulu anciniki linoku. Tena tojengmi antu nanrapi nawa nawangku. Nakana tosseng ana loloa: Eh karaeng punna paeng tanamo nanrapi nawa nawangta inakke tosseng appau pau, punna situruki akkalatta assama turu maki, napunna tena nanrapi akkalatta ancuruka. Nakana ALLAHU TAALAH: Tojengi kanannu, barang kana sangkammaki para lahere. Nakanamo nupalakintu sangkamma kammaya na iyaji iya bajikanngangki sijanji saba ikau tonji ampalaki sangkammaya inakke. Nakanamo ana loloa: Eh karaeng ante kamma bateta sijanji, siagang apa naki janjianga, napunna kupakamma janjingku kiancuru mamapole. Nakanamo ALLAHU TAALAH: ri Ana loloa Eh syahada assulu mako rilinoku nanu kangkang ARENG malabbirikki, nakanamo ana loloa: Eh karaeng kerea ARENG malabbiritta kukangkang assulu rilinoa.? Nakanamo ALLAHU TAALAH: Syahadaka kupalettekanko mange ri nurung muhammad, naku sareko bayang-bayang, naku palettekangko mange ri manggenu, naku kangkang junnuka, naku palettekangko seng mange ri angronnu, nanu kangkang satinjaya. Iyaminjo kukellai nuboya punna battuko assulu rilinowa, boya tojeng-tojengi mula titti’nu kaiya iyannamo tau anggappai mula titti’na iyami antu tau rinyawana siagang nyamanna pappisa’ringinna LINO AKHERAT, iya tommintu tau salama satunggu tungguna. Napunna tana gappa iyamintu tau attubu ritakammaya, iyatommintu tau rugi linona sapupala akheratna, iyatomintu atanna iblisi tau nisumpaiya ri ALLAHU TAALAH. Nakana pole ALLAHU TAALAH: Iya iyanamo tau anggapai kujanjiangai, kungai mintu. Napunna kungai kubunoi, napunna kubunoi kusapuki, Napunna kusapuki kalengku kusapukangi. Eh syahada assulu mako a’lahere naku tubu rikau, napunna nugappa ikau tosseng a’tubu rinakke. Nakanamo ana loloa: Naam (iyo) kutarimai janjinku rikatte karaeng. Antei kamma lassulu nalanri kabuku sa’ri battanna angrongku, Nakanamo ALLAHU TAALAH: Kuparekangko agang malambusu. Nakanamo ana loloa: Eh karaeng kiparekamma agang malambusu rilinota. Nakanamo ALLAHU TAALAH: “Inna lillahi wainna ilahi raji’un” Battuanna: Agang malambusu mange ri ALLAHU TAALAH Nampami allapu je’ne ci’nonna, je’ne inunna saggenna lassuna anaka, nakkiomo ALLAHU TAALAH ri JIBRAILU angkana: Oh jibrailu alleinjo nakangkanga assulu rilinowa, Nakanamo jibailu: Eh karaeng punna kualle ri limanna keremi mae kuboli,? Nakanamo ALLAHU TAALAH: Erangi mange ri empoang kaminang matangkasaka siagang pammantangan kaminang mabajika. Apaji nassulumo anaka battu ribattanna angronna, na alle tommi malekaka assulu naerang. Mange naboli ri pammantangan majannang empowang masino-sinowa. Tammat Wallahu a’lamu bisshawaab.